انگلینڈ نے میزبان ٹیم کو 67 رنز سے شکست دے کر 7 میچوں کی سیریز اپنے3-4 سے اپنے نام کرلی۔

پاکستان اور انگلینڈ کے درمیان جاری ٹی ٹوئنٹی سیریز کے آخری اور فیصلہ کن میچ میں انگلینڈ نے میزبان ٹیم کو 67 رنز سے شکست دے کر 7 میچوں کی سیریز اپنے3-4 سے اپنے نام کرلی۔
آخری میچ میں پاکستان کو شکست، انگلینڈ نے ٹی ٹوئنٹی سیریز جیت لی
انگلینڈ نے پاکستان کو آخری اور فیصلہ کن ٹی ٹوئنٹی میچ میں شکست دے کر سات میچوں کی سیریز جیت لی۔
مہمان ٹیم نے آخری میچ میں 67 رنز کے بھاری مارجن سے قومی ٹیم کو شکست دے کر سیریز میں 3-4 سے کامیابی حاصل کی۔

قذافی اسٹیڈیم میں کھیلے گئے سیریز کے فیصلہ کن میچ میں انگلینڈ نے پاکستان کو جیت کے لیے 210 رنز کا ہدف دیا تھا۔

ہدف کے تعاقب میں قومی بیٹنگ لائن ابتدا میں ہی مشکلات کا شکار ہوگئی، اوپنرز بابر اعظم اور محمد رضوان صرف 5 رنز پر پویلین لوٹ گئے۔
بابر اعظم نے 4 اور محمد رضوان صرف ایک رن بناسکے، دونوں کو بالترتیب کرس ووکس اور ریس ٹوپلے نے آؤٹ کیا۔
افتخار احمد اور شان مسعود نے 28 رنز کی شراکت بنائی جو افتخار کے آؤٹ پر ختم ہوگئی، انہوں نے 16 گیندوں پر 19 رنز کی اننگز کھیلی، انہیں ڈیوڈ وِلی نے کیچ آؤٹ کروایا۔

خوشدل شاہ اور شان مسعود کے درمیان 53 رنز کی شراکت بنی لیکن وہ اس بڑے ٹوٹل کے سامنے بہت چھوٹی ثابت ہوئی۔

خوشدل شاہ نے 25 رنز کی اننگز کھیلی جبکہ شان مسعود 56 رنز بنا کر نمایاں رہے۔

ان کے علاوہ کوئی پاکستانی کھلاڑی ڈبل فیگر میں بھی داخل نہیں ہوسکا، قومی ٹیم مقررہ 20 اوورز میں 8 وکٹوں کے نقصان پر صرف 142 رنز ہی بناسکی۔

انگلینڈ کی جانب سے کرس ووکس نے 4 اوورز میں 26 رنز کے عوض 3 اہم وکٹیں لے کر نمایاں گیند بازی کی۔

ان کے علاوہ ڈیوڈ وِلی نے 2 جبکہ ریس ٹوپلے، عادل رشید اور سیم کرن نے ایک ایک کھلاڑی کو آؤٹ کیا۔

واضح رہے کہ پاکستان کو پہلی مرتبہ ٹی ٹوئنٹی فارمیٹ میں ہوم گراؤنڈز پر شکست کا سامنا کرنا پڑا ہے۔