وزیر داخلہ کی امریکی سرمایہ کاروں سے ملاقات، مسائل ترجیحی بنیادوں پرحل کرنے کی یقین دہانی

وفاقی وزیر داخلہ محسن نقوی سے یو ایس پاکستان بزنس کونسل کے اعلیٰ سطحی وفد نے واشنگٹن میں یو ایس چیمبر آف کامرس میں ملاقات کی۔ملاقات کے دوران کان کنی اور انفارمیشن ٹیکنالوجی کے شعبوں میں سرمایہ کاری اور تعاون بڑھانے پر تفصیلی بات چیت کی گئی۔وزیر داخلہ محسن نقوی نے امریکی سرمایہ کاروں کو کان کنی اور آئی ٹی سیکٹر میں سرمایہ کاری کی دعوت دی۔وزیر داخلہ محسن نقوی نے پاکستان میں کام کرنے والی امریکی کمپنیوں کے مسائل سنے، محسن نقوی نے کہا کہ امریکی کمپنیوں سے متعلق مسائل ترجیحی بنیادوں پر حل کریں گے۔ انہوں نے کہا کہ پاکستان معاشی استحکام کی طرف بڑھ رہا ہے، تمام معاشی اشاریے بہتر ہوئے ہیں۔ معیشت ترقی کر رہی ہے، امریکہ نے پاکستان بزنس کونسل کو پاکستان میں سرمایہ کاری کی دعوت دے دی۔وزیر داخلہ نے کہا کہ پاکستان میں سرمایہ کاری کے پرکشش مواقع ہیں، ضروری این او سی کے اجراء کو بہتر کیا گیا ہے۔ امریکن چیمبر آف کامرس کے سینئر نائب صدر چارلس فری مین، امریکہ پاکستان بزنس کونسل کی ایگزیکٹو ڈائریکٹر اور صدر ایسپرانزا گیلالن، ایگزیکٹیو ڈائریکٹر سینٹر فار گلوبل ریگولیٹری کارپوریشن ایبل تاویرس، منیجر امریکہ پاکستان بزنس کونسل منیشا ویپا بھی وفد میں شامل تھیں۔