معروف بھارتی اداکاروں کیخلاف مقدمہ درج

بالی ووڈ اداکار شریاس تلپڑے اور آلوک ناتھ کے خلاف دھوکہ دہی کا مقدمہ درج کر لیا گیا ہے۔ بھارتی میڈیا کے مطابق اداکار شریاس تلپڑے اور آلوک ناتھ کے خلاف ہریانہ کے مرتھل پولیس اسٹیشن میں دھوکہ دہی اور اعتماد کی خلاف ورزی کا مقدمہ 22 جنوری کو درج کیا گیا تھا۔ دونوں اداکار ان 13 افراد میں شامل ہیں جن پر اعتماد کی خلاف ورزی، دھوکہ دہی اور جائیداد کی غیر قانونی منتقلی کے الزامات عائد کیے گئے ہیں۔ایڈیشنل کمشنر آف پولیس (اے سی پی) مورتھل، اجیت سنگھ کے مطابق، شکایت بنیادی طور پر اس سوسائٹی کے خلاف ہے جس پر لوگوں کو سرمایہ کاری کا بہانہ بنا کر دھوکہ دینے کا الزام ہے۔ تحقیقات کے دوران شریاس تلپڑے اور آلوک ناتھ کے کردار کی جانچ کی جائے گی۔شکایت کنندہ وپل انٹیل کے مطابق، سرمایہ کاروں کو یقین دلایا گیا تھا کہ ان کی رقم محفوظ ہے اور میچورٹی پر اسے فوری طور پر واپس کر دیا جائے گا۔انٹیل نے مزید کہا کہ سرمایہ کاروں کو راغب کرنے کے لیے، سوسائٹی نے اعلیٰ درجے کے ہوٹلوں میں تقریبات منعقد کیں، جنہیں تربیتی پروگرام کے طور پر پیش کیا گیا۔ تاہم، بعد میں ایجنٹوں کی مراعات روک دی گئیں اور سرمایہ کاروں کو میچور رقوم کی ادائیگی میں تاخیر ہونے لگی۔ اس کے بعد سوسائٹی کے مالکان نے فون بند کر کے دفاتر بند کر دیے۔سرمایہ کاروں اور ایجنٹوں نے سوسائٹی سے جڑے لوگوں سے رابطہ کیا تو انہیں جھوٹی یقین دہانی کرائی گئی لیکن رقم واپس نہیں کی گئی۔