حکومت کے پاس شرح سود سنگل ڈیجیٹ میں لانے کا بہترین موقع ہے، ایف پی سی سی آئی

ایف پی سی سی آئی نے حکومت کو بتایا ہے کہ اب اس کے پاس شرح سود کو سنگل ہندسوں پر لانے کا بہترین موقع ہے۔صدر فیڈریشن آف پاکستان چیمبرز آف کامرس اینڈ انڈسٹریز عاطف اکرام شیخ نے کہا ہے کہ 27 جنوری کو ہونے والے جائزے میں مارک اپ ریٹ کو سنگل ڈیجٹ پر لایا جائے۔اپنے ایک بیان میں انہوں نے کہا کہ اسٹیٹ بینک کے پاس پالیسی ریٹ کو 7 فیصد تک لانے کی گنجائش ہے اس لیے رواں ماہ مرکزی بینک کے پاس شرح سود کو سنگل ڈیجٹ پر لانے کا بہترین موقع ہے۔عاطف اکرام شیخ نے کہا کہ معاشی اشاریے مثبت ہیں اور مہنگائی کی شرح میں کمی آئی ہے۔ مہنگائی میں کمی کا فائدہ عام آدمی تک پہنچانا بھی ضروری ہے۔صدر ایف پی سی سی آئی نے کہا کہ تعمیراتی صنعت کے لیے متوقع حکومتی پیکج بھی ملک میں خوشحالی لائے گا۔ مارک اپ کی شرح میں کمی سے رقم کی گردش میں اضافہ ہوگا۔ بینکوں میں پڑا پیسہ صنعتوں میں لگایا جائے گا جس سے صنعتوں کی پیداوار بڑھے گی اور روزگار کے مواقع پیدا ہوں گے۔انہوں نے کہا کہ پاکستان میں بے روزگاری کی شرح 7 فیصد ہے جس میں کمی سے براہ راست غربت میں کمی آئے گی۔