دفتر خارجہ نے پاک چین دوستی کو نشانہ بنانے والی قیاس آرائیوں کو مسترد کردیا

میڈیا کی قیاس آرائیوں کا جواب دیتے ہوئے دفتر خارجہ نے پاکستان اور چین کی دوستی کو نشانہ بنانے والی رپورٹس کو سختی سے مسترد کردیا۔اپنے بیان میں ترجمان نے کہا کہ پاکستان “ون چائنہ پالیسی” کے بنیادی اصول پر غیر متزلزل یقین رکھتا ہے، چین پاکستان کی خارجہ پالیسی کا مستقل اور مضبوط ستون ہے، چین پاکستان کا ہمہ موسمی سٹریٹجک پارٹنر ہے۔دفتر خارجہ کے ترجمان نے کہا کہ یہ تعلقات باہمی اعتماد، مشترکہ اقدار، بنیادی مسائل پر حمایت اور علاقائی اور عالمی استحکام کے عزم کی عکاسی کرتے ہیں۔دریں اثناء پاکستان نے سوڈان کے دارفور میں سعودی الفریش ہسپتال پر حملے کی مذمت کی ہے۔ترجمان دفتر خارجہ کی جانب سے جاری بیان میں کہا گیا ہے کہ سوڈان میں سعودی اسپتال پر حملہ بین الاقوامی قوانین کی صریح خلاف ورزی ہے۔ معصوم شہریوں کو شدید خطرات لاحق ہیں۔دفتر خارجہ نے مزید کہا کہ حملے میں مبینہ طور پر 70 افراد ہلاک ہوئے۔ پاکستان متاثرین اور ان کے اہل خانہ سے اپنی گہری ہمدردی کا اظہار کرتا ہے۔ ہم سمجھتے ہیں کہ تنازعات کو مذاکرات اور سفارت کاری کے ذریعے ہی حل کیا جا سکتا ہے۔ پاکستان اتحاد، خودمختاری اور علاقائی سالمیت کی مکمل حمایت کا اظہار کرتا ہے۔