بانی پی ٹی آئی سے عاطف خان، شاہ فرمان اور جنید اکبر کی ملاقات کی اندرونی کہانی سامنے آگئی

پاکستان تحریک انصاف (پی ٹی آئی) کے بانی سے پارٹی رہنماؤں عاطف خان، شاہ فرمان اور جنید اکبر کی ملاقات کی اندرونی کہانی سامنے آگئی ہے۔ذرائع کا کہنا ہے کہ پی ٹی آئی کے بانی نے کے پی میں مبینہ کرپشن، پارٹی معاملات کی تحقیقات کا ٹاسک جنید اکبر اور عاطف خان کو دیا اور سابق گورنر شاہ فرمان کو بھی اس کی تحقیقات کی ہدایت کی۔بانی نے بعض صوبائی وزرا کے کرپشن میں ملوث ہونے سے متعلق استفسار کیا، بانی پی ٹی آئی نے کے پی حکومت کی کارکردگی کے بارے میں بھی سوال کیا، بانی نے تینوں رہنماؤں سے پوچھا کہ پارٹی معاملات کیسے ہیں؟تینوں رہنماؤں نے بانی پی ٹی آئی پر حکومتی کارکردگی اور کرپشن کے الزامات پر کہا کہ وہ تصدیق نہیں کرتے لیکن معلوم کریں گے۔ بانی نے تینوں رہنماؤں کو ہدایت کی کہ وہ اگلی ملاقات میں معلومات فراہم کریں۔دوسری جانب پی ٹی آئی رہنما عاطف خان نے گفتگو کرتے ہوئے کہا کہ بانی نے صوبائی صدارت پر ہم سے مشاورت کی، انہوں نے حکومتی کارکردگی اور صوبائی وزرا پر مبینہ کرپشن کے الزامات کے بارے میں بھی پوچھا۔عاطف خان نے کہا کہ ہم نے جواب دیا کہ ہم نے سنا ہے، تاہم تصدیق کریں گے، اجلاس میں وزیراعلیٰ کو پارٹی کی صوبائی چیئرمین شپ سے ہٹانے پر کوئی بات نہیں ہوئی۔