فرحان سعید اور عروہ نے ماضی میں علیحدگی کی افواہوں کی تصدیق کردی

اداکارہ عروہ حسین اور گلوکار و اداکار فرحان سعید نے بالآخر ماضی میں پھیلنے والی علیحدگی کی افواہوں کی تصدیق کر دی ہے۔ایک حالیہ انٹرویو میں فرحان سعید نے کہا کہ ان کی شادی میں ایک مشکل وقت تھا جب ان کا رشتہ ایک تکلیف دہ دور سے گزر رہا تھا لیکن خاندان نے ہمیشہ ان کا ساتھ دیا اور رہنمائی کی۔فرحان سعید کا کہنا تھا کہ رشتے میں عزت اور احترام ضروری ہے اور یہی چیز ان کے رشتے کو دیرپا بنا۔ اداکار نے کہا کہ شادی میں تمام تر مسائل کے باوجود ہم نے کبھی ایک دوسرے کے خلاف سرعام کچھ نہیں کہا۔فرحان سعید کا کہنا تھا کہ ہر رشتے میں اتار چڑھاؤ آتے ہیں لیکن ہم نے ایک دوسرے کو وقت دیا اور ایک بار پھر سب کچھ بھول کر ایک ساتھ جڑ گئے۔فرحان اور عروہ نے مداحوں کو یہ بھی مشورہ دیا کہ وہ اپنے ساتھی کا احترام کریں اور بات چیت کے ذریعے اپنا مسئلہ حل کریں اور کسی کے سامنے اپنے ساتھی کو برا بھلا کہنے سے گریز کریں کیونکہ پیچھے کی بات کرنا کسی بھی رشتے کو مشکل بنا سکتا ہے۔خیال رہے کہ کچھ عرصہ قبل سوشل میڈیا پر عروہ حسین اور فرحان سعید کی علیحدگی کی افواہیں گردش کر رہی تھیں تاہم یہ دونوں ایک بار پھر ایک ساتھ نظر آئے اور یہ افواہیں پہلے بچے کی پیدائش کے بعد دم توڑ گئیں۔