پاکستان کی خوشحالی دہشت گردی کے خاتمے سے جڑی ہے: وزیراعظم

وزیراعظم شہباز شریف نے کہا کہ دہشت گردی کا مکمل خاتمہ ہمارا مشن ہے، پاکستان کی خوشحالی دہشت گردی کے خاتمے سے وابستہ ہے۔وفاقی کابینہ کے اجلاس سے خطاب کرتے ہوئے وزیر اعظم شہباز شریف نے کہا کہ لیفٹیننٹ حسن اشرف شہید نے جان دینے سے پہلے 6 جانیں جہنم واصل کیں، دہشت گردی کے خلاف ان قربانیوں کو ہمیشہ یاد رکھا جانا چاہیے۔وزیراعظم نے کہا کہ برادر ملک ترکی کے صدر دو روزہ دورے پر پاکستان آئے، ترکی نے ہر فورم پر پاکستان کا ساتھ دیا، ترکی نے ہمیشہ دل کھول کر پاکستان کا ساتھ دیا، ترکی کے صدر نے کشمیر اور فلسطین کی آزادی کے لیے آواز بلند کی۔
شہباز شریف نے کہا کہ ترکی اور پاکستان کے درمیان برادرانہ تعلقات ہیں، ترکی کے ساتھ تجارتی حجم بڑھانے پر اتفاق کیا گیا ہے۔گزشتہ دنوں ایک گیلپ سروے جاری ہوا، گیلپ سروے میں تاجر برادری کو ایک سال میں پالیسی پر 55 فیصد اعتماد ہے۔انہوں نے کہا کہ گزشتہ روز ورلڈ بینک کے وفد سے ملاقات ہوئی، انہوں نے اقتصادی اشاریوں کی تعریف کی۔