افغانستان ویمن کرکٹ ٹیم کے نمائشی میچ کا اعلان

کرکٹ آسٹریلیا نے افغانستان کی خواتین کرکٹ ٹیم کے لیے نمائشی میچ کا اعلان کر دیا ہے۔ ویمنز ایشز کے پہلے ٹیسٹ کے پہلے روز افغانستان کی خواتین ٹیم اور کرکٹ ودآؤٹ بارڈرز کی ٹیم ایکشن میں ہو گی۔ کرکٹ آسٹریلیا کے مطابق ٹی ٹوئنٹی میچ 30 جنوری کو میلبورن کے جنکشن اوول گراؤنڈ میں کھیلا جائے گا۔ آسٹریلوی کرکٹ بورڈ کا کہنا ہے کہ اس نے آسٹریلیا میں افغانستان کی خواتین کرکٹ ٹیم کے ارکان کی خواہشات کو پورا کرنے کے لیے میچ کے انعقاد کا فیصلہ کیا ہے۔یہ میچ خواتین کی کرکٹ میں شمولیت کا جشن منانے کے تاریخی دن کا حصہ بھی ہوگا۔ کرکٹ آسٹریلیا نے کہا کہ یہ میچ آسٹریلیا میں مقیم افغانستان کی خواتین کرکٹ کھلاڑیوں اور دیگر اسٹیک ہولڈرز کی مشاورت سے منعقد کیا گیا ہے۔ کرکٹ آسٹریلیا کے چیف ایگزیکٹو نک ہاکلے نے کہا کہ کرکٹ اور کمیونٹی کے بہت سے لوگوں نے افغانستان کی خواتین ٹیم کو آسٹریلیا میں آباد ہونے میں مدد کی ہے اور یہ میچ ان کے کام کو منانے کے لیے ہے۔