پاکستان میں مہنگائی کی شرح 78 ماہ کی کم ترین سطح پر آگئی

پاکستان میں مہنگائی کی شرح 78 ماہ کی کم ترین سطح پر آگئی۔ ادارہ شماریات کے جاری کردہ اعداد و شمار سے پتہ چلتا ہے کہ نومبر 2024 میں مہنگائی کی شرح 4.9 فیصد کی سطح پر ریکارڈ کی گئی تھی جب کہ اکتوبر 2024 میں مہنگائی کی شرح 7.2 فیصد تھی۔ اعداد و شمار کے مطابق نومبر 2023 میں مہنگائی کی شرح 29.2 فیصد تھی جب کہ نومبر 2024 میں شہری علاقوں میں مہنگائی 5.2 فیصد تھی۔ اور دیہی علاقوں میں 4.3 فیصد ریکارڈ کیا گیا۔ادارہ برائے شماریات کے مطابق گزشتہ ماہ اشیائے خوردونوش میں 0.5 فیصد کا معمولی اضافہ ریکارڈ کیا گیا، گزشتہ ماہ ٹماٹر، انڈے، دالوں، شہد اور آلو کی قیمتوں میں اضافہ ریکارڈ کیا گیا۔ اعداد و شمار کے مطابق گھی، مکھن، خشک میوہ جات، مچھلی اور کوکنگ آئل کی قیمتوں میں اضافہ، گندم، ریڈی میڈ خوراک، مشروبات، گندم کے آٹے، جوتوں اور الیکٹرانک اشیاء کی قیمتوں میں بھی اضافہ ہوا۔