دنیانمیبیا کے صدارتی انتخابات میں پہلی مرتبہ ایک خاتون نے میدان مار لیا

ونڈہوک: نندی ندایتو نمیبیا کی پہلی خاتون صدر منتخب ہوگئیں۔ جنوبی مغربی افریقہ پیپلز آرگنائزیشن (SWAPO) پارٹی کی نندی ندایتو نے نمیبیا کے صدارتی انتخابات میں کامیابی حاصل کر لی ہے اور وہ ملک کی پہلی خاتون صدر منتخب ہو گئی ہیں۔ رپورٹ کے مطابق 72 سالہ نندی نے صدارتی انتخاب میں 57 فیصد ووٹ حاصل کیے جس کے بعد صدارت کے لیے دوبارہ ووٹنگ (رن آف) کے امکانات ختم ہو گئے ہیں۔غیر ملکی میڈیا کا کہنا ہے کہ نندی ندایتو کی جیت سے ان کی پارٹی کو مزید طاقت ملے گی جو 34 سال سے اقتدار میں ہے۔ واضح رہے کہ نمیبیا نے 1990 میں جنوبی افریقہ سے آزادی حاصل کی تھی اور اس کے بعد سے وہاں جنوبی مغربی افریقہ پیپلز آرگنائزیشن (SWAPO) پارٹی کی حکومت قائم ہے۔