وزیراعظم شہباز شریف کی صدر آصف زرداری سے ملاقات، سیاسی صورتحال پر تبادلہ خیال

صدر آصف علی زرداری اور وزیر اعظم شہباز شریف نے ملک کی ترقی کے لیے مل کر آگے بڑھنے کے عزم کا اعادہ کیا ہے۔اس عزم کا اظہار انہوں نے پیر کو اسلام آباد میں ایوان صدر میں ملاقات کے دوران کیا۔ملاقات کے دوران فریقین نے مجموعی سیاسی، اقتصادی اور سلامتی کی صورتحال پر تبادلہ خیال کیا۔دونوں رہنماؤں نے تمام سیاسی اسٹیک ہولڈرز کی مشاورت سے قانونی معاملات پر آگے بڑھنے کا فیصلہ کیا۔ انہوں نے پارلیمنٹ میں قانون سازی سے متعلق امور پر بھی تبادلہ خیال کیا۔صدر نے وزیراعظم کو ملک کی ترقی اور استحکام کے لیے اپنے تعاون کا یقین دلایا۔ وزیراعظم نے صدر آصف علی زرداری کی صحت کے لیے نیک خواہشات کا اظہار کیا۔ملاقات میں نائب وزیراعظم و وزیر خارجہ اسحاق ڈار، وزیر داخلہ محسن نقوی، گورنر خیبرپختونخوا فیصل کریم کنڈی، سابق وزیراعظم راجہ پرویز اشرف اور رکن قومی اسمبلی سید نوید قمر بھی موجود تھے۔