بیرسٹر سیف کا کرم میں امن دشمن عناصر کے خلاف سخت کارروائی کا عہد

خیبر پختونخوا کے مشیر اطلاعات بیرسٹر ڈاکٹر سیف نے کرم میں امن خراب کرنے والے عناصر سے آہنی ہاتھوں سے نمٹنے کے عزم کا اظہار کیا ہے۔ اپنے بیان میں بیرسٹر سیف نے زور دیا کہ طے پانے والے معاہدے کے مطابق کرم میں ہر حال میں امن کو یقینی بنایا جائے گا۔ گرینڈ جرگہ کے دوران انہوں نے ڈپٹی کمشنر پر حملے کو امن کو سبوتاژ کرنے کی ناکام سازش قرار دیتے ہوئے عوام سے اپیل کی کہ کرم امن دشمن عناصر کے خلاف چوکس رہیں۔ انہوں نے مقامی کمیونٹی سے مطالبہ کیا کہ وہ خطے میں دیرپا امن برقرار رکھنے کے لیے انتظامیہ اور حکومت کے ساتھ تعاون کریں۔ وزیراعلیٰ نے واقعے کا سخت نوٹس لیتے ہوئے ملزمان کو انصاف کے کٹہرے میں لانے کی ہدایت کی ہے۔ بیرسٹر سیف نے مزید کہا کہ سیکیورٹی خدشات کے باعث قافلے کو عارضی طور پر روکا گیا ہے تاہم کلیئرنس ملنے کے بعد اسے آگے بڑھنے دیا جائے گا۔