سعودی عرب کا ٹرمپ کی پیشکش پر سخت جواب

سعودی عرب نے واضح کیا ہے کہ فلسطینی ریاست کے قیام کے بغیر اسرائیل کے ساتھ تعلقات قائم نہیں ہوں گے۔ سعودی وزارت خارجہ نے امریکی صدر ڈونلڈ ٹرمپ کے بیان پر ردعمل دیتے ہوئے کہا ہے کہ فلسطین کے بارے میں مملکت کا مؤقف مستحکم اور غیر متزلزل ہے اور کسی بھی صورت میں اس کی کوئی اور تشریح کی اجازت نہیں ہے۔ سعودی وزارت خارجہ کے مطابق ولی عہد شہزادہ محمد بن سلمان نے بھی کھلے اور دوٹوک انداز میں اس موقف کی تصدیق کی ہے۔. بیان میں مزید کہا گیا ہے کہ سعودی عرب فلسطینیوں کے جائز حقوق کی جدوجہد میں ان کے ساتھ کھڑا ہے اور فلسطینی ریاست کے قیام تک اسرائیل کے ساتھ سفارتی تعلقات قائم نہیں کرے گا۔ یہ بھی پڑھیں: عمران خان کا اڈیالہ جیل سے آرمی چیف کو خط، کیا جواب آیا؟ سعودی عرب نے امریکی صدر کے فلسطینیوں کو بے دخل کرنے کے منصوبے کی مخالفت کرتے ہوئے ایسی کسی بھی کوشش کو مسترد کرتے ہوئے اپنے موقف کا اعادہ کیا ہے۔