پاکستان کشمیریوں کیساتھ کھڑا، کسی بھی جارحیت کا منہ توڑ جواب دیا جائیگا، آرمی چیف

آرمی چیف جنرل سید عاصم منیر نے کہا ہے کہ پاکستان ہمیشہ کشمیریوں کے ساتھ کھڑا رہے گا، کسی بھی جارحیت کا منہ توڑ جواب دیا جائے گا۔ پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے یوم یکجہتی کشمیر کے موقع پر مظفر آباد کا دورہ کیا، جہاں انہوں نے شہداء کی قربانیوں کو خراج عقیدت پیش کیا، انہوں نے جموں و کشمیر شہداء کی یادگار پر پھول چڑھائے اور شہداء کی بے مثال قربانیوں کو زبردست خراج عقیدت پیش کیا۔کشمیری شہداء کو خراج عقیدت پیش کرتے ہوئے آرمی چیف نے مشکل آپریشنل حالات کے باوجود کشمیر میں تعینات افسروں اور جوانوں کی غیر متزلزل لگن، پیشہ ورانہ مہارت اور جنگی تیاریوں کو بھی سراہا۔ انہوں نے ان کے بلند حوصلے اور چوکسی کی تعریف کی اور کسی بھی مخالف اشتعال انگیزی کا مقابلہ کرنے کے لیے اعلیٰ آپریشنل تیاری کو برقرار رکھنے کی اہمیت پر زور دیا۔ آرمی چیف نے مسلح افواج کی جنگی تیاریوں پر مکمل اعتماد کا اظہار کرتے ہوئے یہ یقین دہانی کرائی۔کسی بھی جارحیت کا بلا تاخیر جواب دیا جائے گا، انہوں نے پاک فوج کے عزم کا اعادہ کرتے ہوئے کہا کہ ہم قوم کی خود مختاری اور علاقائی سالمیت کے دفاع میں پوری طرح مصروف ہیں۔بعد ازاں آرمی چیف نے کشمیر کی اہم شخصیات اور عمائدین سے ملاقات کی اور مقبوضہ جموں و کشمیر کے عوام کی پاکستان کی حمایت جاری رکھنے کا اعادہ کیا۔ آرمی چیف نے کہا کہ بھارت کے مظالم اور بڑھتی ہوئی ہندوتوا انتہا پسندی کشمیری عوام کے عزم کو مضبوط کرتی ہے۔جو حقِ خود ارادیت کی لڑائی میں۔ انہوں نے کہا کہ اس عزم کو دوہرایا کہ پاکستان ہمیشہ ساتھ رہے گا اور ریاستی جبر و استبداد کے خلاف ان کے حق پر مبنی مقصد کی حمایت کرے گا۔