امریکی صدر ڈونلڈ ٹرمپ نے اہم فیصلوں پر دستخط کر کے انتظامی امور کا آغاز کر دیا

حلف برداری کی تقریب کے بعد امریکی صدر ڈونلڈ ٹرمپ نے کئی ایگزیکٹو آرڈرز پر دستخط کر کے انتظامی امور کا آغاز کر دیا۔ٹرمپ نے سابق صدر جو بائیڈن کے 78 صدارتی اقدامات کو منسوخ کر دیا، جن میں اقتصادی اور سیاسی اصلاحات کے اہم فیصلے بھی شامل ہیں۔وائٹ ہاؤس کے مطابق صدر ٹرمپ نے دارالحکومت حملے میں ملوث 1500 افراد کو معافی دینے کے حکم نامے پر بھی دستخط کیے۔ صدر ٹرمپ نے فائلوں پر دستخط کیے اور انہیں حاضرین کو دکھایا۔ کیپیٹل ایرینا میں منعقدہ اس شاندار تقریب میں ٹرمپ کے حامیوں کی بڑی تعداد نے شرکت کی اور تالیوں اور نعروں سے ان کا استقبال کیا۔ تقریب میں پولیس، کھلاڑیوں اور مختلف اداروں کے دستوں نے صدر مملکت کو سلامی دی۔اس موقع پر ٹرمپ نے اپنے خاندان اور قریبی ساتھیوں کا عوام سے تعارف کرایا اور ان کے بارے میں خوب باتیں کیں۔اپنے خطاب میں صدر ٹرمپ نے کہا کہ وہ پچھلی انتظامیہ کے تباہ کن ایگزیکٹو آرڈرز کو منسوخ کریں گے، مہنگائی کو کم کرنے کے لیے فوری اقدامات کریں گے، اور مجرموں کو ان کے ملکوں کو واپس بھیجیں گے۔انہوں نے بائیڈن انتظامیہ کی طرف سے لگائی گئی آف شور ڈرلنگ پر پابندی ختم کرنے کا اعلان کیا۔